கேட்ட வரத்தை வழங்கும் எட்டுக்குடி முருகன் கோயில்

தமிழகத்தில் முருகப்பெருமானின் அறுபடை வீடுகளுக்கு இணையாகப் போற்றப்படும் தொன்மையான கோயில்களுள் நாகப்பட்டினம் மாவட்டத்தில் அமைந்துள்ள எட்டுக்குடி சுப்பிரமணியசுவாமி கோயிலும் ஒன்றாகும்.

அருணகிரிநாதரால் திருப்புகழ் பாடப்பெற்ற இத்தலம், வேண்டுபவரின் மனநிலைக்கு ஏற்ப முருகன் தன் உருவத்தை மாற்றிக்கொண்டு காட்சியளிக்கும் அற்புதத் தலமாகக் கருதப்படுகிறது. இங்குள்ள மூலவர் சிலை ஒரு சிற்பியின் ஈடு இணையற்ற பக்தியின் அடையாளமாக நிலை பெற்றிருப்பது தனிச் சிறப்பாகும்.

தல வரலாறு

கந்தபுராணத்துடன் தொடர்புடைய இத்தலத்தின் வரலாறு, ஒரு சிற்பியின் தியாகத்தோடு பிணைந்துள்ளது. நாகப்பட்டினத்திற்கு அருகில் உள்ள சிக்கல் என்ற ஊரில் வாழ்ந்த சிறந்த சிற்பி ஒருவர், ஒரு அற்புதமான முருகன் சிலையை வடிவமைத்தார். அச்சிலையின் அழகைக் கண்டு பொறாமை கொண்ட சோழ மன்னன், சிற்பி மீண்டும் இதுபோன்ற சிலை வடிக்கக்கூடாது என்ற எண்ணத்தில் அவருடைய கட்டை விரலை வெட்டி விட்டான்.

வேதனையடைந்த சிற்பி மற்றொரு ஊருக்கு வந்து, கட்டைவிரல் இல்லாமலேயே அதே போன்று மற்றொரு சிலையை உருவாக்கினார். சிலை முழுமையடைந்த நிலையில் அதிலிருந்து தெய்வீக ஒளி வீசத் தொடங்கியது.

மதுரையில் அடித்துக் கொல்லப்பட்ட நரிக்குறவ பெண்- இன்று காவல் தெய்வமான கதை

அப்போது அந்த வழியே வந்த முத்தரசன் என்ற குறுநில மன்னன், அச்சிலையிலிருந்து மயில் பறக்கத் தொடங்கியதைக் கண்டு காவலர்களைப் பார்த்து "எட்டிப்பிடி" என்று உத்தரவிட, மயில் அங்கே சிலையாக நின்று விட்டது. இவ்வாறு "எட்டிப்பிடி" என்ற வார்த்தை காலப்போக்கில் மருவி எட்டுக்குடி என்றானது. இதே சிற்பி பிறகு கண்கள் இழந்த நிலையிலும் உருவாக்கிய முருகன் சிலைதான் எண்கண் தலத்தில் உள்ளது என்றும் கூறப்படுகிறது. 

தீபாவளியை கொண்டாடும் மாப்பிள்ளை ரங்கநாதர்- சுவாரசிய கதை தெரியுமா

தல அமைப்பு

இக்கோயிலின் மூலவர் சன்னதி கிழக்கு நோக்கி அமைந்துள்ளது. இங்கு முருகப்பெருமான் வள்ளி மற்றும் தெய்வானையுடன் மயில் மீது அமர்ந்து காட்சி அளிக்கிறார். மூலவர் சண்முகர் மூன்று முகங்களும், 12 கைகளும் கொண்டு, மயில் மீது அமர்ந்திருக்கும் இந்த சிற்பம் ஒற்றைக் கல்லில் செதுக்கப்பட்டதாகும்.

பொதுவாக மற்ற தலங்களில் மயிலின் தலை வலப்புறம் இருக்க, இங்குள்ள மயிலின் தலை இடப்புறம் நோக்கி உள்ளது சிறப்பு அம்சமாகும். மேலும் சிலையின் மொத்த எடையும் மயிலின் இரு கால்களால் மட்டுமே தாங்கப்படுவது சிற்பக்கலையின் அதிசயமாகும்.

பிற சன்னதிகள்:

முருகப்பெருமான் சன்னதிக்கு வலப்புறத்தில் லிங்கத் திருமேனியுடன் சௌந்தரேஸ்வரர் சன்னதியும், இடப்புறத்தில் ஆனந்தவல்லி அம்மன் சன்னதியும் அமைந்துள்ளன. மேலும் விநாயகர், சீனிவாச சௌந்தரராஜ பெருமாள், ஆஞ்சநேயர், நவக்கிரகங்கள், பைரவர் ஆகியோருக்கு இங்கு தனி சன்னதிகள் உள்ளன. 18 சித்தர்களில் ஒருவரான வான்மீகி சித்தர் இங்கு ஜீவசமாதி அடைந்த சிறப்பும் இக்கோயிலுக்கு உண்டு. இக்கோயிலின் முன்பு குளம் ஒன்று அமைந்துள்ளது.

வேண்டுதல்கள்

எட்டுக்குடி முருகன் தன்னை நாடிவரும் பக்தர்களின் எண்ணங்களை நிறைவேற்றும் வரப்பிரசாதியாக அருள்பாலிக்கிறார். இங்குள்ள மூலவர் உக்கிரமாகக் காட்சி அளிப்பதால், பக்தர்கள் பாலாபிஷேகம் செய்வது மிகவும் சிறப்பு.

குழந்தை வரம்:

குழந்தை பாக்கியம் இன்றி வரும் பக்தர்கள் இங்கு வந்து முருகனை வழிபட்டால் விரைவில் குழந்தை வரம் கிடைக்கும் என்பது ஐதீகம்.

நோய் நீக்கம்:

இங்குள்ள சரவணப் பொய்கைத் தீர்த்தத்தில் நீராடினால் பாவங்கள் நீங்கி நோய்கள் தீரும் என்று நம்பப்படுகிறது.

 வழிபாட்டு நேரம்:

இக்கோயில் பொதுவாக காலை 6:30 மணி முதல் நண்பகல் 12:30 மணி வரையிலும், மாலை 4:30 மணி முதல் இரவு 9 மணி வரையிலும் பக்தர்கள் தரிசனத்திற்காக திறந்திருக்கும். எனினும் திருவிழா மற்றும் விசேஷ நாட்களில் நேரங்களில் மாற்றம் இருக்கும்.

அறுபடை வீடுகளுக்கு இணையாக திகழும் எட்டுக்குடி முருகன் கோயில், சிற்பக்கலையின் மகத்துவத்தையும், முருகப்பெருமானின் வீரத்தையும், அருளையும் ஒருங்கே உணர்த்தும் ஒரு தலமாகும். பக்தர்கள் வேண்டும் வரத்தை அளித்து, வாழ்வில் எல்லா நலன்களையும் அருளும் இந்த வேல் நாயகனை வணங்கி செல்வது பெரும் பேறாக கருதப்படுகிறது.