காசிக்கு அடுத்த மயானம்- பலரும் அறியாத மதுரை தத்தனேரி சுடுகாட்டு காளி
காளி என்றாலே உக்கிரமானவள், காளி என்றாலே அதீத சக்தி வாய்ந்தவள் என்று பக்தர்கள் பயம் கொள்வது உண்டு. எப்படி தன் பிள்ளைக்கு அநீதி நடப்பதை பார்த்துக் கொண்டு ஒரு தாய் அமைதியாக இருக்க முடியும். அப்படி தட்டி கேட்பது தான் உக்கிரம் என்றால் காளி தாய் அநீதி செய்பவர்களுக்கு கட்டாயம் உக்கிரமானவள் சக்தி வாய்ந்தவள் தான்.
மேலும் இந்த காளி வழிபாடு என்பது எல்லோருக்கும் அவ்வளவு எளிதாக வந்துவிடாது. இந்த காளியை சரணடைவதற்கு ஒருவருக்கு நல்ல காலம் பிறக்க வேண்டும். அந்த நல்ல காலம் பிறந்தால் தான் காளி தேவியை சரணடைந்து அவர்களுடைய கெட்ட காலம் விலகக்கூடிய அமைப்பு உண்டாகும்.
அப்படியாக நம்முடைய ஊர்களில் பல்வேறு இடங்களில் பல முக்கியமான காளி கோவில்கள் இருக்கிறது. ஆனால் காசிக்கு அடுத்த இடமாகவும் பக்தர்களின் தீராத குறைகளை தீர்க்கும் அம்மாவாகவும் மதுரை தத்தனேரி சுடுகாட்டு காளி அம்மன் அருள் பாலித்து வருகிறார். மதுரை பல ஆன்மீக சிறப்புகளைக் கொண்டது.
அங்கு நம் கால் வைக்கும் இடங்களில் எல்லாம் ஆன்மீக வரலாறு சொல்வதை நாம் காணமுடியும். அப்படியாக மதுரையில் தத்தனேரி சுடுகாட்டில் அமைந்து பக்தர்களுக்கு அருள் பாலித்து வருகிறாள் தத்தனேரி சுடுகாட்டு காளியம்மன். பொதுவாக காளிக்கு குங்குமம் கலந்த குருதி அபிஷேகம் செய்வார்கள்.
ஆனால் தத்தனேரி சுடுகாட்டு காளியம்மனுக்கு உண்மையாகவே குருதியால் அபிஷேகம் செய்யப்படுவது குறிப்பிடத்தக்கது. இங்கு உள்ள காளியம்மனிடம் நமக்கு என்ன குறைகள் இருந்தாலும் அதை அவளிடம் நம்பிக்கையாக சொல்லி வழிபாடு செய்ய நிச்சயம் நமக்கான தீர்வை அவள் கொடுக்கிறாள் என்பது பக்தர்களுடைய நம்பிக்கையாக இருந்து வருகிறது.
மேலும் இந்த கோவிலில் அமாவாசை நாட்களில் மிகச்சிறப்பான வழிபாடுகள் நடைபெறுகிறது. பக்தர்கள் காளியை வழிபாடு செய்து விட்டு தங்களுக்கு ஏதேனும் குறைகள் இருந்தால் ஒரு எலுமிச்சை பழம் வாங்கி வந்து அதை சூலத்தில் குத்தி வைத்து விடுகிறார்கள்.
இவ்வாறு செய்யும் பொழுது காளி அவர்களின் தங்களுடைய குடும்பத்தை எட்டு திசையிலும் இருந்து காப்பாற்றுகிறாள் என்பது அவர்களுடைய நம்பிக்கையாக இருக்கிறது. மேலும், சுடுகாட்டுக்கு அருகில் இந்த கோவில் அமைந்து இருந்தாலும் பக்தர்கள் பயம் இல்லாமல் இங்கு வந்து அம்மனை வழிபாடு செய்து விளக்கு ஏற்றி வேண்டுதல் வைத்து செல்கிறர்கள்.
அதாவது குழந்தைகள் முதல் பெண்கள் என பெரியவர்கள் வரை அனைவரும் மிக ஆவலுடன் இந்த அம்மனை பார்த்து தரிசித்து செல்வது இந்த அம்மனுடைய சக்தியை நமக்கு உணர்த்துகிறது.
பூஜைகள்:
இந்த கோவிலில் அமாவாசை நாட்களில் காலை 8 மணியிலிருந்து 10 மணி வரை நடக்கக்கூடிய குருதி பூஜையானது மிகவும் விஷேசம் மற்றும் சக்தி வாய்ந்தது. இந்த பூஜையில் நாம் கலந்து கொண்டு நம்முடைய வேண்டுதல்கள் வைக்க அது உடனே நிறைவேறும் என்று சொல்கிறார்கள்.
அதுமட்டுமல்லாமல் உங்களுக்கு செய்வினை அல்லது கண்திருஷ்டி போன்ற கோளாறுகள் இருந்தால் இந்த குருதி பூஜையில் நீங்கள் கலந்து கொண்டு அந்த பூஜையை பார்க்கும் பொழுது உங்களுக்கான பாதிப்புகள் எல்லாம் உடனடியாக விலகி நல்ல வாழ்க்கை கிடைக்கும் என்றும் கூறுகிறார்கள்.
அது மட்டும் அல்லாமல் ஒவ்வொரு வெள்ளிக்கிழமையும மற்றும் ஞாயிற்றுக்கிழமை ராகு காலமான 5 முதல் மாலை 7 மணி வரை இங்கு பூஜை விசேஷமாக நடைபெறுவது வழக்கம்.
ஆக தங்களுடைய வாழ்க்கையில் கிரக பாதிப்புகள் அல்லது செய்வினை பாதிப்புகள், கண் திருஷ்டி, எதிரிகள் தொல்லை வழக்கு தொடர்பான பிரச்சனைகள் என நீங்கள் என்ன பிரச்சினையை சந்தித்துக் கொண்டு இருந்தாலும் மனதில் மிகுந்த நம்பிக்கையோடு இந்த தத்தனேரி சுடுகாட்டு காளியை வந்து சரணடைய நீங்கள் அவளை வழிபாடு செய்து சென்ற மறுநொடி உங்கள் கவலை தீர்ந்து போவதை பார்க்க முடியும் என்று பக்தர்கள் சொல்கிறார்கள்.
| ஆன்மீகம்/ஜோதிடம் குறித்த தகவல்களை பெற IBC பக்தி வாட்ஸ் அப் குழுவில் இணைந்து கொள்ளுங்கள். |
